فيديو وصور كنافة ودوناتس من شباب المعادي لصائمي رمضان والمسيحيين

أوانٍ كبيرة تحتوى على صنوف من الطعام والشراب يحملونها، يهرولون بها نحو السيارات مع أذان المغرب، يصرون على المار والراكب، المسلم والمسيحي، أن يأخذ منهم، مثلهم مثل كثير من الشباب في مناطق عدة، ولكن المختلف هذه المرّة هو أن الأوانى التي يوزعونها بنيّة إفطار صائم محتواها كُنافة بالشكولاتة، ودوناتس.

ففي مساء اليوم الأول من شهر رمضان، انتشرت على مواقع التواصل الاجتماعى بشكل واسع، صور لشباب حى المعادي يوزعون على الصائمين في الشوارع كُنافة بالشكولاتة باهظة الثمن، ودوناتس بالشيكولاتة والفانيليا، مما عرضهم لنقد وردود فعل سلبية كثيرة، من ضمنها "فى ناس مش لاقية تاكل"، "انتوا مُدللين"، بجانب ردود فعل إيجابية شجعتهم على إكمال خطتهم.

إحنا مش بتوع كُنافة بس.. خرج الشباب بهذا الرد على مهاجميهم، ليُعرّفوا أنفسهم ومقصدهم من وراء توزيع الكنافة والدوناتس.. يقول محمد أسامة، شاب عشرينى، وأحد أعضاء الفريق: إحنا مجموعة شباب المعادى شغالين في المعادى من 9 سنين، بنشتغل طول السنة أعمال خيرية، من تنظيف شوارع، لدور مسنين، وبناء أسقف وتوصيل مياه للمنازل المحتاجة في القاهرة والمحافظات، وتحديداً شغلنا بيبقى في رمضان، وكل ده على نفقتنا الخاصة.

منذ 2011، يوزع الشباب- حسب قولهم- 1000 شنطة رمضانية، ووجبات تحتوى على لحوم وأرز وخضار، بجانب توزيع أنفسهم في الشوارع لإفطار المارّة، ولكن هذا العام قرروا أن يخرجوا بتقليعة ويوزعوا حلويات فاخرة، ويرون أن من حق أي إنسان أن يأكلها فهى ليست مُقتصرة على طبقة ما.

ويكمل محمد: مفيش فرق عندنا بين شخص راكب عربية غالية، وشخص ماشى على رجله، حد غنى أو فقير.. فإحنا بنوزع على كل الناس بدون تفرقة، وبنوزع عليهم من اللى بنحبه وبناكله، ويضيف: الموضوع جه صدفة لما حد اتبرع لنا بالكنافة، وبعدها بقينا نعملها عندنا في بيوتنا وننزل نوزعها، والناس بتتبسط جداً.

استاء الشباب بسبب بعض التعليقات السخيفة، كما وصفوها، ويقول محمد: الناس بتتكلم من غير ما تفكر واتضايقنا إن الناس شافتنا تافهين، وكأن مجهودنا الـ9 سنين راح، لكننا مكملين في مشوارنا.

ويكمل محمد: نكمل باقى رمضان في توزيع وجبات، ولو معانا فلوس كفاية هنفضل نوزع على الناس كنافة ودوناتس عشان الناس تتبسط.. في الآخر ده خير لوجه الله.. والحاجات الصغيرة بتعلم مع الناس أكتر من الحاجات الكبيرة.